Nadir Dendoune û “çavê rastîyê”

Translator

Piştî ku sê hefteyan girtî ma rojnamevanê fransî Nadir Dendoune 14ê sibatê ji alîyê rayedarên Bexdadê ve bi dayîna kefaletê hat berdan. Ew bi vîzeyeka rojnamevanîyê û li ser navê Le Monde Diplomatiqueê li Iraqê dima. Ew sala 2003yan jî carekê çûbû Iraqê da ku bibe "mertalê merivî" li hemberî tehlûkeya qewimîna şerî. Ew dihat genehbarkirin bi girtina wêneyên bêdestûr yên qadên hesas (kîjan qad li Iraqê ne hesas e?). Girtina wî bû sedema seferberbûneka girseyî. Sendîkaya neteweyî ya rojnamevanên iraqî, pêşî bi bîr xist ku qedera Dendouneyê zehmetîya rastîya jîyana herêmî nîşan dida: "Em ji hêzên ewlekarîyê dixwazin ku êdî rê li ber xebata rojnamevanên me negirin, dema ew makîneya wênegirîyê bikar tînin jî, ew ji bo nîşandana jîyana rojane ya xelkê tê bikaranîn. Rojnamevan herweha bi kêrî rêzgirtina ji hiqûq û azadîyê re jî tê. Makîneya wênegirîyê ne qalibekî dînamîtê ye yan jî mayineka bi destan hatî çêkirin; ew çekek e ku bi kêrî qêrîna rastîyê tê."

 

Li Fransayê, komîteyek piştgirîya azadkirina wî dike, ya ji alîyê hevalên wî ve hatî organîzekirin, nexasim yên Seine-Saint-Denis û malbata wî, hewldanên xwe zêde kirin. Di dawîyê de, tevgereka ji alîyê Rojnamevanên Sînornenas (RSF) û rêxistinên din ve piştgirîya wê hatî kirin, tevahîya rojnamevanan seferber kir. Bangeke ji alîyê pêncî rojnamevanan hatî kirin di heman demê de di tevahîya rojnameyên fransî de hat weşandin. Gelek kanalên televîzyonê û radyoyan nûçe li ser girtîbûna wî çêkirin û banga azadkirina wî kirin. Li Parîsê û li Bexdadê, rayedarên fermî yên fransî gelek caran gumanên xwe dan zanîn.

 

Bêguman Le Monde Diplomatique beşdarî tevahîya van hewldanan bû. Wê hem li Sefareta Iraqê li Parîsê , hem li cem rayedarên iraqî, hem jî li wezareta karên derve ya Elyséye dengê xwe da bihîstin. Dendoune gelek pirtûk nivîsîn, yek jiwan Lettre ouverte à un fils d’immigré / Nameyeka eşkere ji kurê penaberekî (Danger public, Parîs, 2007) bi awayê otobîyografîyekê hat amadekirin. Wî herweha fîlmek bi navê Filistîn çêkir, ku cara yekem di 31ê kanûna paşîn de li Enstîtuya Cîhana Erebî [li Parîsê] hat nîşandin.

Wergera ji fransî: Feryal Guladawîya