Walid Siti

Wênesazê vê hejmarê
Translator

Walid-Siti

 

Walid Sitî [Welîd Sitî], di sala 1954an de li Başûrê Kurdistanê li bajarê Duhokê ji dayik bû. Piştî ku di sala 1976an de Enstîtuya Hunerên Bedew a Bexdayê xelas kir, ji welêt derket, da ku perwerdehîya xwe ya hunerî li bajarê Ljubljana yê Slovenyayê bidomîne. Berîya ku serî li penaberîya sîyasî bide, di sala 1984an de çû Brîtanyayê. Hîn jî li wir dijî û dixebite.

Sitî, demekê di warê çapkirinê de jî perwerdehî dît û di platformên medyayên cuda de, vîdeo sazkirin, enstelasyon çêkirin û karên “3D” pêk înan. Ew di xebatên xwe de girîngîyeke mezin dide babetên bîr û têkçûnê. Mirov dikare di berhemên wî de vê rêwîtîyê bi awayekî berbiçav bibîne.

Çîroka serpêhatî û jîyana Sitî ji çîroka koçberên din ne cuda ye. Her çiqas ji welatê xwe dûr ketibe jî, di esasê xwe de bi ruhîyeta xwe ve, girêdayî cihê jidayikbûna xwe ye. Sitî, ji mîrateya çandî ya axa xwe îlhamê digire ku sînorên wê axê bûye warê hewlên leşkerî û mobîlîzasyona koçberan. Di xebatên hunermend de, em rastî gengeşeya di navbera nasnameya kolektîf, pevgirêdana dualî û sînordarîyan de tên ku bi temayên mîrate, kevneşopî, xanî, sînor, mobîlîzasyon û penaberîyê li ser takekesan tengezarîyekê çêdike.

Xebatên Sitî di pêşangehên navneteweyî de cih girtine; Martîn Gropîus Bau li Berlînê; Muzexaneya Şerî ya Împaratorîyê (Imperial War Museum) li Londonê; Enstîtuya Çandên Îslamî (Institut des Cultures d’Islam) li Parîsê; tevî wergirtina xelatekê li Bîenala Sharjahê û li Bîenela Venîsê di 2009, 2011 û 2015an de. Herweha di Muzexaneya Hunera Hevçax a Yînchuanê de (Yinchuan Contemporary Art Museum) li Çînê (MOCA); bi navê “Systems and Patterns” (Sîstem û Nimûne) li Navenda Şêwekarîyê ya Navneteweyî (International Centre of Graphics) li Ljubljana, Slovenya û Trîennîala Brugesê li Belçîkayê.

Xebatên wî herweha di koleksîyonên sereke yên navneteweyî de jî cih girtine. Wekî; Muzexaneya Metropolîtanê (The Metropolitan Museum) li New Yorkê; Muzexaneya Brîtanî (The British Museum), li Londonê; Muzexaneya Şerî ya Împaratorîyê li Londonê; Weqfa Hunerî ya Sharjahê (The Sharjah Art Foundation), Weqfa Hunerî ya Barjeelê (The Barjeel Art Foundation) li Mîrnişînên Erebî yên Yekbûyî (MEY); Galerîya Niştimanî ya Ummanê (The National Gallery of Amman) li Urdunê; Bankaya Cihanî (The World Bank) li Waşîngtonê, DC; Muzexaneya Victoria & Albert li Londonê, Weqfa Bîranînê ya Iraqê (The Iraq Memory Foundation), Bernameya Hunerî ya Balyozxaneya Amerîkayê (Art for American Embassy program) li DYA; Muzexaneya Hunera Hevçax a Krakowê.

 

Wergera ji îngilîzî: Bîlal Ata Aktaş

 

Wêneyên Walid Siti